臺日同性登記結婚被駁回 今提行政訴訟
郭柏均 張育睿/臺北報導
發布時間：
更新時間：
雖然臺灣成做亞洲頭一个同性婚姻的國家，毋過結婚的對象其中一人in的國家無允准同性婚姻，佇臺灣猶是無法度登記。有一對日本佮臺灣的情伴就因為按呢予戶政機關拒絕登記，今仔日民間團體為in召開記者會，表示目前已經提起行政訴訟。
跨國同婚訴訟當事人有吉英三郎表示，「佇幾工以後阮去戶政事務所辦理登記，但是煞予拒絕，理由是我是日本人，阮一下真驚疑。」
深情對看，台灣的盧阿樹佮來自日本的有吉英三郎，是交往超過6年的跨國伴侶，但是因為日本無承認同性婚姻，致使in無法度佇台灣登記結婚。伴侶盟表示，已經替in提起行政訴訟。
台灣伴侶權益推動聯盟創會理事長許秀雯講，「是因為內政部行政命令予戶政機關講，婚姻的成立是依各該當事人的本國法，所以若是有一方來自同婚無合法的國家，這个婚姻就無法度佇台灣登記。今仔日只要阿樹抑是有吉換一个性別，In今仔日結婚一點仔困難都無，所以這件代誌本質上就是性傾向歧視。」
針對跨國同性婚姻的困境，監察院嘛佇22公布調查報告，呼籲行政院佮司法院等等機關，愛緊完成修法。伴侶盟表示，in高度肯定這擺的調查報告。
許秀雯表示，「大法官釋字748號解釋，當初佇2017年5月24做成的時，是予立法機關兩年的修法期限。監委的調查報告明確指出，司法院提出涉外民事法律適用法修正期程，其實超過這兩年的期限。送到行政院，行政院閣延延一年外，目前嘛猶未送到立法院。」
有吉英三郎目前是以工作簽證的方式，才會使踮佇台灣。伴侶盟建議，佇完成立法進前，先研議相關的行政措施，放冗跨國伴侶依親居留的權利，予遮的跨國伴侶會使先放心踮佇台灣，嘛向望跨國同性婚姻會使趕緊佇台灣全面合法。
2022杭州亞運 台灣百金之路
