新竹動物園迎虎年 面冊分享刊文通領紀念票

為著迎接虎年,初一、初二這兩工,民眾若去新竹動物園,佇面冊分享文章,就會當提著「虎年紀念票」,真濟人走來看虎,也通順紲領紀念票。

囡仔看到動物園內底的虎,歡喜唱囡仔歌,新竹動物園兩隻孟加拉虎,分別號做「六福」佮「來福」,因為是雙生仔,兩隻虎定定會耍做伙,特別受著大人囡仔歡迎。

來參觀的家長講,「過年tshuā囡仔來動物園行行的,囡仔無看過虎,所以來遮看。」

動物園特別用IN的模樣製作紀念票券,初一佮初二來tshit迌的遊客完成任務,就會使提著古錐的虎年紀念票券。限量一千份。

新竹動物園園長楊礎遠講,「動物園有兩隻虎,一隻叫六福,另外一隻叫來福。六福較定著,來福較皮,所以設計兩款套票,逐家會使來看,佗一隻是來福佮六福,會使來揣寶。」

動物園提醒遊客,一定愛配合防疫措施,落實實聯制,全程掛喙罨,另外動物園人數只要滿1500人就會啟動人流管制,請民眾配合。

全台敬老金大調查

相關新聞