高雄五甲關帝廟開國運"中平籤" 提醒注意疫情

五甲關帝廟今年國運籤，猶是神明降臨，透過筆生寫籤詩，觀音菩蕯開出中平籤，籤詩講著年內疫癘超苦海，拄好反映這馬的疫情。

五甲關帝廟總務，鄭偉信表示：「彼个疫癘就是這个疫情誠嚴峻，誠嚴格，逐家愛注意，四月時陣，物資會漸漸穩定落來，疫情愛七月可能較平穩小可仔。」

廟方表示，四季籤嘛講著今年春夏秋平平，冬季運勢較有利。嘛是因為疫情，高雄真濟廟寺過年活動取消，逐年初九天公生攏鬧熱滾滾的鳳山天公廟，今年過年廟門佮金爐攏關起來。

鳳山天公廟董事，蔡正昌表示：「六組人四周圍管制，今年無愛開廟門，無愛賣金紙，人員管制愛量體溫。」

民眾表示：「只要你有心來參拜就， 用手，包括燒香慢慢仔改善，毋免。」

另外親像五甲龍成宮取消初二轉後頭辦桌，旗山天后宮初一搶頭香嘛取消，高雄市民政局要求廟寺過年期間遊街出巡、搶頭香等等的活動攏停辦，廟寺干焦一个出入口管制，予民眾過年參拜嘛會做好防疫。