內政委員會到新竹談合併 林智堅缺席引議論

立法院內政委員會1/13來到新竹,討論新竹合併相關的行政區域,佮地制法修法,毋過煞無看著新竹市政府派人參加會議。市長林智堅表示,立委應該佇立法院負責審查法案,無應該用技術性來阻擋大新竹合併升格。

立法院內政委員會透早來到新竹市議會,針對大新竹合併升格議題,進行地方意見交換討論。召集委員林為洲對新竹市長林智堅無來參加會議,表達真遺憾,民進黨總召柯建銘強調,希望後禮拜就會使佇委員會進行相關討論。


立委 林為洲:「較可惜的是,新竹市政府敢有派人來參加,我閣再一次強調,有無仝款意見阮攏是歡迎,修法的時陣就會使參考逐家的意見,將來修法內容就會使更加完整」。

民進黨立院總召 柯建銘:「後禮拜才欲審地制法,審完了後出委員會,愛一個月後才通表決,所以逐家毋免緊張」。


新竹市長林智堅表示,國民黨有3个立委提出3種版本的地方制度法,而且閣要求必須先送地方議會同意了後,才閣送行政院,這款做法反背地方的意見。


新竹市長 林智堅:「用真濟技術性的方式做抵制,我相信市民縣民的目睭攏看會清楚,逐家攏會知影,是啥人咧阻擋大新竹合併升格,阻擋大新竹的發展」。


另外針對新竹欲成立合併升格專案辦公室,林智堅嘛強調,目前當咧邀請專家學者參與,看疫情變化,應該會佇過年後成立。


 

全台敬老金大調查

相關新聞