核四就起佇徛家邊 在地人一透早就出門投票

民眾噴酒精消毒、磅體溫，工作人員嘛掛面罩佮喙罨，做好防疫措施，就會使來投票。摃仔寮的澳底國小離核四廠區只有幾百公尺，遮真早就有民眾陸續來投票。

摃仔寮投票民眾講，「天氣無講蓋好，人攏會較晏出來，阮較早來投票，袂排著隊，真順利。」也有人講，「免啥排啦，入去就有法度隨投矣，真順勢。」

向土地公拜拜祈求了後才去投票，另一爿佇澳底公園，是鹽寮反核自救會前會長吳文通投票的所在。伊講這擺用真濟方法來宣傳，希望戶籍佇摃仔寮的少年人，攏會使轉來投票。

鹽寮反核自救會前會長吳文通表示，「前兩工阮有掃街，按呢的動作阮嘛有。阮是透過規个網路族群，抑是透過家庭的聯絡，向所有的少年人呼籲，恁就一定愛轉來（投票）。」

吳文通希望重啟核四公投莫通過，北台灣民眾才免煩惱核四的安全問題。貢寮區的投票權人，計共有10765人，毋過重啟核四提案的公投，是愛以全國1982萬外人盈暗的投票結果，來決定摃仔寮居民的厝邊，現狀是毋是會閣來改變。