高雄五倍券2百換夜市券4百箍 民眾排隊搶欲換

高雄市推出商圈夜市券欲帶動消費,第二批加送十萬份,這兩工開始換,因為頂一批排隊人傷濟,引起民怨,這擺經發局提早發號碼牌仔,而且特別為序大佮tshuā囡仔的民眾,增設愛心櫃台。

為著搶欲兌換夜市券,有人插隊,現場人員出面維持秩序,高雄市推出用200箍五倍券,就會使換400箍夜市券,第二波閣有十萬份,又閣出現誠濟民眾排隊。

民眾:「感覺這算會和啊,下晡可能閣會去排一斗」。


其實現場排隊對29暗時就開始,佇光華夜市遮,路邊排欲幾百公尺長,連巷仔內嘛滿滿攏是欲兌換的民眾,有人已經排欲三四點鐘。

民眾:「兩點外就來排,所以第一个」。

民眾:「為著兩百箍,排三點鐘」。

這擺經發局提早驗證、分號碼牌,對29暗時至12月初五,佇全市49个地點兌換,而且這擺閣為75歲以上序大,猶有tshuā囡仔的民眾,設置愛心櫃台。想袂到兩千份一下仔就發了了,排隊的民眾真辛苦,夜市佮商圈的頭家是笑咍咍,攏期待會當刺激消費。


三鳳中街店家郭小姐:「比頂一波差不多加一兩成,人客攏提夜市券來消費」。

因為紲落來就欲過年矣,中街的店頭無閒咧進貨,頭家嘛希望這擺的夜市券,會當閣增加商機。

 

全台敬老金大調查

相關新聞