新竹水資源公園大薸生湠 恐驚影響渡鳥停歇

原本應該是清泱泱的湖面，這馬煞予規片的水芙蓉崁去，遠遠看過去叫是草地，實在有淡薄仔危險，而且水芙蓉生湠速度誠緊，閣按呢落去，水鳥恐驚會沓沓仔連欲歇睏的空間攏無矣。

民眾：「較早是邊仔一點仔，無湠甲全部攏是，這馬是連湖面攏看袂著矣」。
 

新竹野鳥學會老師吳佳炳：「無水，野鳥就無欲來，無法度來是真可惜」。

保育團體揣民眾做伙鬥相共，用網仔撈起來，毋過量實在傷濟，感覺按怎罟攏罟袂了。

水上救生協會總幹事韓福雙：「水芙蓉佇湖面下跤每一叢攏連做伙，欲用手工來搝是誠無方便，可能愛用怪手」。

浪愛傳遞動保協會理事長邵柏森：「以生態復育來講，應該是愛予渡鳥有所在過冬，歇地是愈濟愈好」。

市政府表示，會到現場了解狀況，派人清除，希望用上緊的速度，恢復公園原底的模樣。