護理師替人注過期疫苗捷重耽 竟然猶照常升職

新竹峨眉鄉衛生局，頂個月有護理師幫囡仔注著過期的流感預防射，議員追查發現，其實這名護理人員，舊年嘛捌出過相siang的差錯，毋過這名護理人員竟然閣會使升職。

新竹縣議員連郁婷：「109年3月的時陣就已經共一筒四合一的疫苗、干焦會使注佇5歲囡仔的疫苗，注佇2歲8個月囡仔身軀頂，後來110年又閣注毋著疫苗。我想這件代誌逐家攏無法度接受。」

衛生局提出解釋，10月14疫苗注毋著的前兩工，升職的派令就已經落來矣，所以毋是後來才升職，紲落來嘛會開會討論這名人員的資格閣再做評估。
 

新竹縣衛生局人事主任周新登：「發生注毋著流感疫苗的時陣阮嘛連鞭開考紀會，共護理長記過一改。護理長是毋是適任這馬的職位阮會開相關會議，要求主管佮衛生所主任針對這个案件做通盤檢討。」

過期的疫苗目前閣無造成甚麼傷害，猶毋過衛生局嘛表示，會繼續釐清發生疏失的原因，嘛會針對相關人員追究相關責任。