臺灣新聞攝影大賽 反送中.南鐵東徙攏著獎
發布時間：
更新時間：
攝影記者定定是徛佇新聞事件的前線，共影像留落來，予觀眾會使看著上新、上要緊的記錄。台灣新聞攝影協會舉辦「台灣新聞攝影大賽」，對2000外件作品內底揀出143件著獎的作品，做伙來看過去這一年，攝影記者為咱留落來啥物重要的影像。
畫面當中一領黃色雨幔，一陣香港民眾頭犁犁，追悼一位佇反送中運動內底跳樓自殺的市民，這是台灣新聞攝影大賽的年度最佳新聞相片。
2021台灣新聞攝影大賽評審團主席林樂群講，「伊用一个懸角度來翕，象徵的意義真強。這張相片人看了後，會使有真濟思考的空間，予觀眾留下真深刻的印象。」
南鐵東徙的上尾一戶，是黃春香in兜，佇咧強制拆除進前，黃春香佇警方設立的封鎖線頭前開聲哭。林樂群講，這件作品佮黃色雨幔彼件，予評審團真僫決定啥人是冠軍。
林樂群講，「現場情緒做真精準的記錄，嘛真有象徵意義。(黃色雨幔作品)事件代表性佮張力，可能較強一屑仔。記者的工課是真無閒的，真僫有時間會使暫停來思考反省，參與這款活動是一个自我檢視，佮同業互相比並一个真重要的機會。」
這擺兩千外件作品參賽，143件得獎，林樂群講，希望會閣較濟人來參與，共層面做較闊。嘛透過展覽予逐家看著遮的作品，逐家互相觀摩，提升新聞攝影的能力。
