開臺王顏思齊登陸雲林滿400冬 今辦展覽說歷史

導演魏德聖tshuā領逐家，一項一項來看400冬前顏思齊來台灣的時陣，所使用的物件。雲林縣政府為著欲予民眾知影，400冬前台灣開台第一庄的歷史佮人物，28這工正式舉辦顏思齊特展。

雲林縣長 張麗善講：「我想這歷史的定位，就是阮今仔日為啥物欲用開台400冬，1621大航海時代來開始整個台灣，登台非常非常重要的立場」

導演 魏德聖表示：「用現代的角度來看彼个時代，就是一个用性命換性命的年代，提物資換物資，毋過是用性命換性命的年代」

這改顏思齊特展的主要場所，有北港糖廠的倉庫、水林鄉顏厝竂的顏思齊故事館，閣佇164滯洪池展示當初駛來台灣的仝形船仔，導演魏德聖嘛共電影的道具，借予雲林縣政府，希望完整呈現400冬前的歷史。

雲林縣文化觀光處長 陳璧君指出：「阮對舊年開始，就開始進行有關開台400冬，這段歷史再造，所有學者專家的論壇，提供豐富的智識，會當予相關地標佮地方文化，一个有力的證明」

雲林縣政府表示，除了展覽，閣有走讀、表演等等的活動，希望重現歷史的方式，毋但予在地人了解地方歷史，嘛會當對內底揣著屬於家己的在地文化品牌。