蔣渭水動畫說文協事 尪仔冊閣免費送學校

這馬的台灣人對蔣渭水佮伊經歷的彼个時代有偌濟了解？會當透過蔣渭水基金會進前出版的台灣維新蔣渭水這本尪仔冊來了解。

蔣渭水基金會執行長，蔣朝根表示：「彼陣是想欲予較少年的，來了解這段歷史，這馬會使講，圖並文字較予人會接近，逐家較無彼个耐性，有當時仔一張圖會使講真濟文字，一張圖就會使共表示。」

學校的冊本內底，對蔣渭水的一生、經歷過的階段、歷史名詞等等的紹介有限，基金會才想講出版尪仔圖的傳記，予讀者會當輕鬆閱讀日本時代到今，民主啟蒙過程的幾个重要階段。配合文協百冬，也開放台北市小學的圖書館免費領取。

蔣渭水基金會執行長，蔣朝根表示：「譬如講文化協會的創立，抑是講東京議會請願，彼个謝文達，台灣頭一个飛行士，駛飛行機來掖傳單，像這款阮攏共變成影片。」

「我等攏是亞細亞，黃色的人種。」

除了尪仔冊，基金會最近閣推出幾若齣動畫影片，親像這段影片以靜修女中做背景，搭配文化協會會歌，描繪蔣渭水佮林獻堂等人佇遮創立台灣文化協會的事件，希望用多元的方式，紹介這段台灣本土意識暴穎的歷史。