佇新竹市，最近發現有民眾違法，東門城、護城河偷偷放生，予人叫做是小龍蝦的「美國螯Ngô蝦」，結果生一大堆，市政府緊倩人掠，短短五工就掠超過3000隻。
網仔對水內底凊彩一撈，就掠到幾若隻美國螯蝦，邊仔的桶仔內底數量閣較驚人，因為民眾不當放生，美國螯蝦已經佇護城河內底大量湠種，才五工的時間市府就掠超過3000隻。
民眾表示水溝河邊釣來遮放生，市府人員表示有家長會tshuā囡仔提網仔去掠螯蝦。
美國螯蝦誠gâu生湠，閣加上破壞力強，會危害生態環境。市府呼籲民眾，千萬毋通隨意放生，若無會依照野生動物保育法處罰。
新竹市城銷處長顏章聖表示，五工就掠三千隻美國螯蝦，數量真驚人，呼籲民眾千萬毋通共美國螯蝦擲入去護城河，依照野生動物保育法第32條規定
會處罰5萬至25萬的罰金。
市政府表示，美國螯蝦大約佇1980年入來台灣，因為肉質䆀予人隨意放生，嚴重影響環境，過去各地攏有傳出過災情，嘛干擾原本平衡的生態。
