擔當雙十煙火演奏 高雄市立交響樂團拚排練

今年雙十煙火佇高雄,負責這擺煙火配樂的高雄市立交響樂團,最後這幾工攏咧排練。用心安排的配樂,有臺灣音樂、民謠、電影配樂,咱作伙來看覓。

離雙十節賰無幾工,為著這擺煙火,高雄市立交響樂團逐工排練配樂,雙十煙火彼工會當聽著啥物音樂,嘛先公開予民眾欣賞。

電影〈刻佇我心底的名字〉,主題歌曲改編成做交響樂版本,予人無仝的感受,毋但有流行的台語華語歌曲,嘛有太陽花運動主題歌〈島嶼天光〉等等,今年三十分鐘的煙火音樂,無閣使用西方古典音樂,民謠、電影配樂佮流行歌曲,全攏是台灣的音樂。

高雄市副市長史哲,「這四大段落配合今年拄好嘛是文協一百年,嘛是臺灣行出疫情的一年,內底迒過臺灣五六十年,對臺語歌曲到經典流行音樂,包括臺語、華語、客語、閣有原住民音樂。」

今年雙十煙火佇高雄港邊,放煙火的範圍有三公里闊,進前試放才用一台船,雙十節彼工是七台船仝一个時間放,七彩煙火配合逐家攏熟耳的台灣音樂,欲予民眾那看煙火那綴咧唱。
 

相關新聞

專題|全台敬老金大調查