竹北水礱挨米廠停紡20冬 今開放導覽活化農村

計畫主持人現場講解按怎透過水流，會使予挨米的機器紡起來，新竹縣竹北東海地區，這間水礱挨米廠，是台灣難得閣保存完整的挨米工廠。

竹北市民代表，蔡蕥鍹表示：「有真寶貴的歷史意義，因為是目前全國唯一，以水做動力來挨米的水礱間。」

清大創新育成中心主任，李天健表示：「這个空間目前是誠清爽，毋過阮舊年來的時陣，堆滿真濟物件，所以阮第一个任務，就是共空間清出來，予水礱間重新出現。」

這座起佇1928年、倚百年歷史的挨米廠有兩層樓懸，經過整理重新運作，透過導覽活動，予學校會使來遮學著社區營造的相關經驗。

亞東科大副教授，何健鵬表示：「對阮來講其實是誠好的學習機會，因為阮目前當咧對地方創生做發展，透過參訪予學生嘛會使知影，若是欲配合這款計畫才有新的方向，應該按怎去做處理。」

計畫主持人講，紲落來會繼續辦活動，希望民眾對水礱間閣較了解，進一步熟似客家文化，體會傳統的農村生活。