9/20是台灣獨立運動先輩史明過身2周年的日子，伊佇新莊的徛家嘛成立史明文物館，佇今仔日開幕，總統蔡英文嘛有到位表達敬意。
台語詩人蔡奇蘭，講出對史明歐吉桑的懷念
鹿耳門漁夫 蔡奇蘭吟詩，「史明歐吉桑你若離我先走，台灣人大聲哭。」
猶有伊上佮意的現代舞表演。
9/20是台灣獨立運動的大前輩史明過身兩冬的紀念日，予台獨運動的支持者尊稱做歐吉桑。伊為著台灣獨立走傱，所留下的珍貴文物資料，這陣佇伊的新莊故居－史明文物館展出。
總統 蔡英文表示，「會當看著文物館有真濟手稿、文件、藏書，是一个運動的史明館、資料館，嘛是一个予閣較濟台灣人認捌史明的空間，透過歐吉桑的史觀，來思考台灣、觀照世界，凝聚台灣人的主體意識。」
史明出生佇日本時代，留學日本，捌參加中共抗日，後來不滿共產黨轉來台灣，成做左派的台獨主張和行動者，予國民黨政府通緝，佇日本流亡四十冬，堅定主張台灣民族主義參獨立建國。
財團法人史明教育基金會董事長 黃敏紅表示，「伊已經將種子種佇阮的心肝內底，只等待發芽、發穎，然後規个台灣攏開遍著獨立，一身之獨立、一國之獨立。」
黃敏紅表示，感謝兩千外位的民眾集資，予史明文物館的計畫順利進行，除了台灣館，史明流亡日本東京開的麵店，也成功保留成做展覽館，保存伊的革命理念。