招銀行推電子五倍券 蘇貞昌:出33億.加462萬份

客家委員會配合行政院振興措施，推出客庄券2.0，客庄券2.0每份500箍，比舊年浪漫客庄旅遊券每份800箍金額較少，毋過今年總共有40萬份，比起舊年28萬份較濟，而且今年是開偌濟、扣偌濟，免像舊年愛以100箍做單位。

客委會副主委，鍾孔炤表示：「總共發40萬份，欲2億，阮估計這兩億，阮會使帶動地方產業的提升，地方經濟的提升會使帶動地方產值16億。」

舊年的浪漫客庄旅遊券就無實體券，採用數位發行，今年嘛相仝。外界煩惱數位發行，可能有部份民眾袂曉用，客委會講，希望會曉用的人，共規家伙仔攏𤆬來客庄𨑨迌，而且數位客庄券使用真簡單，業者反應嘛真好。

客庄業者，莊碧芳表示：「較早逐家攏會想講，真驚用數位券。但是阮佇使用上，核銷方面、收券方面會發見，阮免一張一張去收，嘛免一張一張去點。」

客庄券2.0對9月22開始登記，但是抽籤佮發券的日期，閣愛配合行政院五倍券政策的時間、才會做決定，目前暫時決定開放使用的時間，是11月中到明年4月底，會使佇全台有客庄券標章的店頭使用。