"璨樹"掃上北 基隆潮境公園猶有民眾去看海湧

璨樹風颱掃來台灣,毋過下晡時仔,基隆煞猶有民眾走去看海湧,海巡人員嘛佇現場提醒民眾著愛細膩。氣象局表示,雖然璨樹佇下晡、已經轉做中度風颱,毋過明仔載各地頭,受著風颱的影響,攏會落雨,提醒觀眾朋友、嘛是愛注意。

海湧拍佇駁岸,海水噴甲比人較懸,十一下晡佇基隆潮境公園,雖講無啥雨,但是風已經真透,現場海巡人員提醒民眾,愛保持距離。

民眾:「趁風颱來進前緊來看一下,無明仔載可能愛規工踮佇厝內。」

「若是真正風雨傷大,坦白講風雨大就袂閣倚近矣。」

中央氣象局簡任技正,伍婉華表示:「基隆北海岸、東半部沿海地區、恆春半島佮南部沿海地區,攏已經觀測著長湧的現象。東爿海面上北的過程,規个東部海岸閣有北部海岸,未來風佮海湧嘛會明顯加強。」

璨樹風颱估計拜六暗時,開始閣較明顯影響北部地區,明仔載規工,全台攏有雨。

中央氣象局簡任技正,伍婉華表示:「下昏暗八點到明仔早起八點,除了遮的所在落雨以外,佇山區猶有西部一寡所在,嘛漸漸開始落雨,甚至到禮拜除了今仔日(9/11),已經落雨的所在,西半部地區,佮澎湖、金門、馬祖攏會落雨。」

璨樹風颱下晡已經減弱,成做中度風颱,毋過氣象局提醒,璨樹風颱的結構實腹,猶是愛注意大湧佮風雨。

九合一選戰解析

相關新聞