新竹內灣老街才因為疫情穩定，有遊客轉來行踏；想袂到今閣公佈桃園確診的機師，進前捌來過內灣老街，害遮的生理煞又閣敗落去。
冷清清的新竹內灣老街，放眼看過去無幾个遊客，做生理的擔仔商嘛閒到開始耍手機仔，因為確診的桃園機師進前來過遮，遊客人數受誠大的影響。
內灣店頭家：「希望內灣恢復較早彼款，進前的人潮。」
內灣商圈理事黃先生：「九月其實應該是內灣的大月，因為有真濟學校會來內灣，譬如講校外教學抑是畢業旅行等等，這馬就攏看袂著學生矣。」
擔仔商講其實疫情警戒對三級降做二級了後，內灣的生理有漸漸恢復，想袂到才無偌久的時間，這馬又閣受著疫情的衝擊。
內灣商圈理事黃先生：「疫情爆發了後，知影確診機師來過內灣，阮就發現人潮比過去又閣少矣。（大概減幾成）這馬大概零零星星的遊客，按呢看起來，真正大概只有上好時陣的十分之一。」
雖然新竹縣政府已經派環保局來內灣完成消毒，猶毋過遊客心肝內嘛是會驚驚，擔仔商無奈表示，真正咧欲做袂落去矣。
