霧台"櫻花王"破病焦蔫 明年恐驚袂當獻嬌媚

霧台鄉蓋出名的櫻花王，這馬規欉樹仔攏是乾死的樹絡，看無綠色葉仔，想袂到已經五六十歲的櫻花王，雄雄破病，當地民眾真煩惱。

霧台居民 賴天雄煩惱講，「（櫻花王）共商機帶來阮部落，若無櫻花王，明年過年無知影欲按怎過？」

霧台櫻花王，每一冬櫻花攏開甲規樹頭，規欉樹仔粉紅色的櫻花，親像一支足大足媠的雨傘，是南台灣賞櫻花的出名景點，毋過今年初花期過，葉仔攏落了了，樹仔就破病矣，霧台鄉長表示，三冬前樹醫生就提醒，櫻花王已經老化，愛修剪。

霧台鄉長杜正吉表示，「（櫻花王）老化，開始崩敗、枯枝，這三四冬會出現。當時共阮講，因為阮專業不足，彼時陣無處理。」

屏東縣政府講，in會請樹醫生來會勘診斷，毋過鄉長表示，這欉櫻花王恐驚袂閣再開花，佳哉公所已經佇其他所在種真濟櫻花樹，明年二月霧台猶是會當看著櫻花美景。