臺原創電影"良夜不能留"."瀑布" 入圍威尼斯影展

導演-蔡明亮的短片「良夜不能留」和導演-鍾孟宏的電影「水沖」攏入圍威尼斯影展的單元。另外,美國紐約亞洲電影節,也有6齣臺灣電影入選,其中,柯貞年導演所翕的「無聲」,閣予主辦單位揀做是海報的主視覺,唌目睭。

運用豐富的色彩,予日常生活的萬物攏有性命,這齣描寫人類和環境困境的3D動畫片,易智言導演的「廢棄之城」,確定入選美國紐約亞洲電影節,入選的猶閣有這齣。

描寫聽無的弱勢者予人性侵草踏的真實故事,2020年柯貞年導演拍的「無聲」,毋但入選,紐約亞洲電影節閣共這張相片揀做海報主視覺,反映後疫情時期復出的感受。

電影「無聲」監製 瞿友寧:「我感覺這齣電影真正會當去到美國,予美國中部的人會當看著,當地的華人可能也期待足久矣,我感覺這攏是好代誌。」

除了「廢棄之城」、「無聲」,包括愛情黑色喜劇「腿」、顛覆莎士比亞經典劇作的「揭大歡喜」等等計共6齣台灣電影攏入選,包括香港、日本、韓國計共60外齣影片,規模有史以來上大,預定8月初6開始,佇紐約實體電影院和線頂播送。

文化內容策進院董事長丁曉菁:「台灣的創作者選擇的題材,誠濟攏和世界共感,少年世代的創意工作者,in佇類型和議題的結合已經足純熟,一步一步拍開國際能見度。」

最近台灣導演蔡明亮的短片「良夜不能留」,和導演鍾孟宏拍的電影「瀑布」也攏入圍威尼斯影展單元,台灣毋但體育表現出擢,咱的影視作品也受國際肯定。

九合一選戰解析

相關新聞