北藝中心群聚案 工人搤工地無照指示停工

臺北表演藝術中心的工地，進前煏出新冠肺炎濟人確診，市政府要求5月28到6月14停工消毒，毋過今煞有議員接著投訴，講工地無老實停工。

台北市士林的台北表演藝術中心工地，進前有發生新冠肺炎的感染事件，市政府講，佇發現了後，5月28到6月14這段時間，工地停工消毒。毋過市議員黃郁芬講，有工人投訴佇5月29、30兩天，猶有工人去上班。

台北市議員黃郁芬說，「台北市政府講停工了後，猶是有咧動工，阮實際上嘛有發現5月28、29佮30攏有相關的施工日誌，阮發現5月28、5月29相關有入場的人數，分別是77个佮56个。」

黃郁芬講，工人私底下向伊表示，只是希望會當佇安全的環境食頭路，今仔日共問題點出來，希望市府著重視。

台北市副市長蔡炳坤表示，「阮佇北藝中心有四个標，其中室內裝修標佮劇場設計標，這兩个標猶閣佇咧進行，得著這个消息(確診)了後，這兩个工地佇5月28、29緊完成，包括停工申請、停工降載，予規个工區會使佇5月28到30，會使分區完成清潔消毒。」

針對蔡炳坤的回應，黃郁芬講，當初市府是講，工區是全面停工，佮這馬的講法是有衝突，而且清潔消毒作業哪會予工人來做，這閣是另外一个問題。