嘉義縣設防疫消毒網站 予民眾通隨時查進度

嘉義縣有山區也有海邊仔，為著欲予民眾知影，環境消毒的進度，嘉義縣環保局，有標記熱區、確診者行踏過的，佮預防性消毒等等的標示，攏總有404个所在。嘛佇網路頂頭，成立防疫消毒網，希望民眾會當隨時了解，地方的消毒進度。

為著防止疫情擴大，嘉義縣的人流熱點、確診跤跡，繼續攏有消毒人員會來消毒，嘉義縣環保局統計，目前已經動員超過3500人次，消毒6000外位，遮的資料這馬攏囥佇網路頂，予民眾會當查詢消毒的進度。

嘉義縣環境保護局長張根穆：「我去這个所在敢有安全，抑我去高鐵敢有安全，有任何問題攏會當來這个消毒網，來看一下目前消毒的狀況佮成果。」

嘉義縣政府表示，今仔日全國防疫會議，有向中央反映，希望佮北部縣市仝款，予奶母、司機、市場人員攏會當接種疫苗，而且針對農漁民四常會去的農會，嘛希望予工作人員注疫苗。

嘉義縣長翁彰梁：「最近真濟疫調，確診者阮發覺講，庄跤足濟人攏會去農會領錢，實際上阮進前的疫調，嘛有發現這種情況，所以我感覺講，農會漁會的第一線工作人員，基本上應該是愛來注疫苗。」

嘉義縣是農業縣，而且老大人人口比率嘛誠懸，縣府強調，為欲增加社區的防疫，消毒的工課猶是袂當放予鬆冗sang-līng，而且希望透過中央的支持，會使對各方面增加群體的防護力，防止疫情的傳播。