蚵仔寮魚市場溢人陣 高市府要求按身份證分流
發布時間:
更新時間:
疫情若穩定,民眾就會開始放冗。假日時仔,佇高雄、蚵仔寮、魚貨直銷中心,是人篋人,有人質疑講:敢會造成防疫空縫。市政府也要求改善。對這禮拜開始,魚市嘛愛按照身份證號碼分流。
民眾來到蚵仔寮魚貨直銷中心,才知影遮愛比照市場分流,有人袂當入去。民眾:「昨昏臨時,阮毋知影,一个踮外面等。」
梓官漁會主任祕書劉連登:「開始實施單號雙號分流管制,一點鐘內底控制人數,大概一百人左右。」
蚵仔寮魚貨直銷中心,疫情開始就管制一个出入口,所有人員佮民眾愛實名登記、量體溫,想袂到頂禮拜的假日,內底煞出現人kheh人,煩惱會影響著防疫,市府要求愛改善,無就關門莫開,所以這禮拜開始,魚市愛比照市場,嚴格管制人數。
攤商:「應該影響愈嚴重,平常真正沒啥人,可能拜六禮拜落雨閣停,真濟人來覕雨。」
攤商:「(生理)差一半較加,這个時陣照理生理是上好。」
蚵仔寮魚市原底有八十幾擔,因為疫情已經有三成暫停營業,假日人客賰無一半,這馬管制愈嚴格,人客可能會愈少,業者雖然無奈猶是會接受,嘛希望民眾會當配合。