嘉義市市場分流 徛名制.照身份證尾數去市場

嘉義市為著減少傳統市場群聚的情況，嘛開始實施市場分流的機制，除了按照身份證碼號分流去市場，逐个擔仔嘛攏利用QR code實施徛名制，民眾佮擔頭仔也攏講認同分流的辦法，毋過實際用手機仔來徛名登記的人，猶是無講蓋濟。

早時的市場，有誠濟民眾來遮買菜，配合防疫措施，這馬嘉義市嘛開始推廣傳統市場分流的管理，攤販協會的工作人員，嘛一位一位的分資料，欲予擔仔來使用。
  因為拜一傳統市場有真濟擔仔歇睏，所以今仔日才是實際執行實名制的第一工，較濟民眾猶是用寫的來登記，用手機的方式猶是毋講蓋濟，毋過針對市場分流的政策，嘛是有民眾表示認同。
 
建設處表示，針對初一十五、拜六禮拜人濟的時陣，嘛會增加人員來宣導，紲落來的五月節，嘛會安排相關的措施，希望莫因為傳統的節日，造成疫情的傳播。