雲林臺西辦海口腔比賽 推廣臺語地方腔口

濟濟學生囡仔佇舞台頂，用台語、地方的腔口演戲、唱歌。這是雲林縣台西鄉所舉辦的比賽，今年已經第3屆。活動的目的就是欲共台語當中的「海口腔」推廣出去，望愈濟人認捌台西這搭的腔口，也了解台西這片土地。

台語當中一種腔口，人講「海口腔」，海口腔是對泉州同安腔來的，毋過腔是比同安腔閣較重，鼻音也更加明顯，語調佮尾音嘛較懸。抑中國泉州因為上倚澎湖佮台南，移民來到台灣的時間也較早，所致來到地的泉州人分佈西部沿海較濟。抑地理位置倚海，較早號做海口的台西，地方的腔口當然就是是泉州系統的海口腔。

參加比賽的學生囡仔，真濟人佇寑開始攏無啥會曉講台語，毋過in發揮海口囡仔毋驚困難的精神，綿爛練習、拍拚學講，今台語嘛會通、講了有輾轉。比賽毋但順利進行，現場競爭也誠激烈，學校老師真肯定學生in的認真，也向望愈濟人鬥陣推廣台西的海口腔。