五分仔車今轉途載人客 安過濾器降空汙

臺灣以早專門咧載甘蔗的五分仔車,因為社會改變,已經轉做觀光,欠點就是有空氣汙染的問題。嘉義縣蒜頭糖廠文化園區這馬開始替五分仔車鬥排煙器,希望減少汙染,提升觀光品質。

兩台五分仔車發動,煙筒管的煙就一直衝出來,猶毋過有鬥排煙過濾器的這台,煙就減足濟。為著欲予坐五分仔車的人,袂閣鼻著油臭味,嘉義縣蒜頭糖廠的五分仔車,欲沓沓仔來改善排煙的問題。

蒜頭蔗埕文化園區的五分車逐年載客量有欲10萬人,嘉義縣政府目前當咧推捒台糖鐵路連接高鐵的建設,希望透過改善五分仔車鐵枝路沿線的空氣品質,會當吸引閣較濟的遊客。

嘉義縣環保局表示,這擺五分車鬥的排煙過濾器,主要是參考阿里山森林鐵路所使用的設備,毋但會當佇網路頂面來監測,每一台五分仔一年也會當減少200公斤的PM2.5,希望未來台糖鐵路連接高鐵佮故宮南院的時陣,會當提升五分仔車的觀光品質。

相關新聞