臺南慰安婦銅像著徙位 民團望市府鬥相共


三冬前,臺灣民間佇臺南設置臺灣頭一座日軍慰安婦阿媽的銅像,這馬煞因為銅像tshāi的土地,佮國民黨、臺南市黨部做伙拍賣、換地主,銅像可能著愛徙走。目前地主答應寬限五年,民間團體也希望市政府鬥相共,替銅像揣適當的地點。

臺灣第一座前日軍慰安婦阿媽的銅像,就安佇臺南市區街仔頭,毋過未來可能愛徙走。

阿媽銅像所徛的這塊地,原底是國民黨臺南市黨部的空地,因為予人拍賣換地主,市黨部已經搬來東區林森路遮,賰銅像毋知欲徙去佗位,回顧銅像風波,2018年拄設置,就發生日本人作勢欲共踼的事件,影片一下出來,彼个時陣引起真濟台灣民眾的不滿。

國民黨副祕書長謝龍介跳出來批評,認為政府這三冬來對慰安婦議題攏恬恬無動靜。
 
其實這个銅像,是干焦逐冬8月14國際慰安婦紀念日,會舉辦活動,有時陣會有民眾主動來獻花,毋閣這馬阿媽銅像孤單徛佇路邊,濟濟的遊客來遮攏是看對面的林百貨、銀行等等日本時代的古蹟。

學者肯定,臺南的阿媽銅像是對歷史的交代,嘛是對人權的重視、對戰爭的反省,臺南市政府已經請文化局走揣適合的所在,進一步討論,今年年底應該就會有答案。

相關新聞

專題|全台敬老金大調查