李登輝建設臺北重大水利基礎 也影響政治後輩

公視台語台「再見、民主先生」的新聞專題，今仔日欲tshuā觀眾對李登輝的學生、也就是、前臺北市長-黃大洲，來看李登輝、對政治後輩的影響、佮留予臺北市、啥物款的水利建設

想起7月30李登輝過身彼工，下晡三點外，去北榮看老師最後一面，前台北市長黃大洲，抑是李登輝佇台大的學生，說出對這位老師真深的感念。

黃大洲對李登輝真欽佩，伊講李登輝讀的書、書寫的物件濟、伊思想的層面是深閣闊，伊佇1978年台北市長任內，起翡翠水庫，供應大台北地區五百萬人的飲用水。1981年做省主席，做二重埔疏洪道，解決台北市地區定定做大水的問題。

李登輝對農產發展，農產品銷無路的解決方式，並無限制佇經濟供應平衡的原理，伊了解就愛適時運用行政勸導力，解決滯銷問題，這也啟發黃大洲佇做台北市長的時，順利解決雞蛋滯銷，避免大量的雞僆仔去予殺掉的運命。

前總統李登輝佇做臺北市長任內，提出臺北信義計畫區，做省長期間，共圓山動物園徙去木柵、提升地下水系統的建設工程，伊的執政經驗，也提供政治後輩袂少參考的案例。