臺中大甲區德化國小六年級學生郭晁廷，自細漢著致著A型血友病，驚身軀若有空喙，會誠僫康復，所以袂當做傷激烈的運動，就算是按呢，伊積極走揣家己的興趣-魔術，這陣伊閣予人邀請去公益團體變魔術，郭晁廷講透過魔術，通袂記得身苦病痛。

邀請阿嬤去台頂，假欲用刀仔共伊的手罣落來，今年讀國小六年仔的郭晁廷做魔術師，共阿公阿嬤弄共歡喜甲，對郭晁廷的演出，阿嬤是真欽佩。

其實郭晁廷有重度A型的血友病，只要跌倒或者是不注意去撞著，伊身體的傷口就會真歹好，所以自細漢伊就無法度像其他同學仝款，跑來跑去，雖然這曾予伊感覺真失志，不過佇伊讀小學二年仔的時陣，因為看過一場魔術表演，成作開始綴變魔術有興趣，這馬伊毋那加入魔術社，閣予人邀請去公益團體表演。

就親像是魔術帽仔變出來，五花十色的巾仔，郭晁廷無因為先天的病痛綁牢咧，顛倒閣較用心揣出家己的興趣，用魔術增加生活的色彩，也帶予身邊的人真濟快樂和回想的鏡頭。