行行出狀元 草屯同德家商畢業展精彩鬧熱

行行出狀元，推動技職教育，南投草屯同德家商，對餐飲烘焙、觀光、動畫，閣有時尚造型等遮的科目，長期培養人才，逐年也攏會舉辦「畢業成果展」，予學生借機會和家長、校外人士分享所學的內容。

學生做模特兒行佇舞台頂予人看媠，身軀穿的正正是南投草屯同德家商學生了時閣了工，結合無仝圖形的概念，閣用金蔥的布料去設計完成的。看著家己一針一線完成的成果受到真濟人肯定，學生是有夠感動。

另外一爿，遠遠就聞著點心的香味，餐飲和烘焙科的學生也把握畢業成果展的機會，共平常時上好的手藝攏總展出來。

同德家商替學生舉辦畢業成果展，邀請學生的家長、已經畢業的學生，也閣有業界人士來學校欣賞學生三年來的學習成果，學生也借這个有機會和人分享佇學校學的物件。

透過畢業展，學生整理、紀錄家己成長的過程，也望遮的功夫會使成作出社會的重要基礎，找揣閣較濟發展的機會。