宜蘭皮鞋病院替人修理鞋仔 第三代師傅功夫深

往過，有一雙皮鞋是真稀罕的物件。宜蘭市有一間專門替人修理皮鞋的皮鞋病院，佇地方經營五十年，做伙來看修理鞋仔這項傳統技術。

先用砂輪機，共鞋底磨予平，才閣用糊仔，共新的鞋根黏起去，這間開佇宜蘭新民路昭應宮邊仔的皮鞋病院，已經經營五十年。專門替人修理鞋仔，予真濟雙鞋仔起死回生的師傅黃宗傑，已經是第三代，伊講修理的鞋仔的背後，其實有當時仔也是咧修復一段珍貴的記持。

黃宗傑講，往過伊的阿公是咧賣皮鞋矣，曾因為戰爭，歸傢伙仔逃難，戰爭了後因為手頭無資金通賣皮鞋，成作開這間皮鞋病院。總是時代無仝矣，人客送來修理的鞋仔，也無閣再是皮鞋，這陣猶閣有布鞋、高跟鞋、淺拖仔等等。

傳承阿公和爸爸修理鞋仔的功夫，黃宗傑猶閣留惦故鄉，想盡辦法延長每一雙鞋仔的價值和意義，伊的堅持也予這項修理舊鞋的傳統產業有了新的活力。