"追分成功"好吉兆 臺南仁德設特色公園唌人目

追分成功是好吉兆，誠濟民眾，過去攏會專工走去臺中拆這款火車票。今佇咧臺南仁德區的成功里，嘛有設一个追分成功的公園囉，咱做伙來看

平交道的聲音喨喨叫，牌仔面頂寫，追分距離145公里、成功距離1公里，這毋是台中的成功火車頭。這是台南仁德區成功里的「成功火車站」，在地里長和里民做伙共這片拋荒的地，整理變做一座公園、「追分成功」。

鐵支路、舊車牌、平交道，逐項攏誠齊全。里長講，遮的設計攏總改過六遍，逐家做伙激頭殼、出錢閣出力，就是欲打造一個特色公園。

里長感謝在地里民鬥相伨，對無到有，打造一個火車頭公園，過程中嘛有予判勞動服務役的人來鬥做工。結合民間佮社會的力量，予地方加一个散步、翕相的好所在。