舊年駐大阪處長蘇啟誠自殺 楊蕙如等人受起訴

舊年，日本的「關西機場」，因為風颱關起來，網路頂頭有人咧放假消息，講臺灣的旅客倚靠中國的大使館，才有才調脫險，嘛有人出來寫文章應話，閣共責任捒對大阪辦事處彼爿去，致使大阪的外交官蘇啟誠處長行短路。這條案，經過臺北市刑警大隊追查落去，才發現講，幕後咧操作網路的，就是人叫伊「卡神」的一个少年女性「楊蕙如」，今已經是共伊起訴囉。


楊蕙如接受警方訊問的時，無承認講家己是寫文章的人，閣強調，是因為共「用手機連網路」的功能，分phenn予朋友去使用，才會予人誤會。／結果警方閣問楊蕙如的朋友「一个姓蔡的男性」，伊煞直接講，承認代誌有影有做，抑楊蕙如是一月日，提供1萬箍的「賞金」咧共伊指使。／所致，台北地檢署才會認定這个蔡某人，刊文章毀謗公務人員，嘛認定in雙人就是共犯，做一擺同齊起訴。