金鐘獎是臺灣影視界年度上重要的獎項，今仔日就是公佈第60屆入圍名單的日子，台語台攏總入圍五个獎項。根據文化部統計，這改參賽的作品，攏總有1992件，數量創新懸，嘛顯示影視、聲音內容產業的競爭力。另外，今年的特別貢獻獎，是頒予資深演員陳淑芳女士、電視搭景師葉輝龍先生。（新聞標題、導言及內文皆為台語文）
金鐘獎是臺灣影視界年度上重要的獎項，主要是針對經營電視節目、廣播節目、抑是對業界有特殊貢獻的人，透過獎項來肯定優秀的作品和工作人員。金鐘獎辦到今已經第60屆，9/15除了公佈入圍名單，嘛頒特別貢獻獎，予資深演員陳淑芳和電視搭景師葉輝龍。
特別獎項評審委員會主任委員 梁修身：「葉輝龍先生伊一直恬恬做工課，然後嘛袂崁步，予有興趣的朋友來傳承伊的技藝。淑芳老師伊入來這个行業，已經演戲已經60年矣，和咱金鐘的這个年歲是仝款的；伊上難得的就是講，伊是遮爾仔，已經提著真濟榮譽，然後閣袂崁步。」
公視台語台，攏總入圍五項。包括「下半場練習生」入圍生活風格節目獎、「阿猴出任務」入圍兒少節目主持人獎、「無事坐巴士」入圍自然科學人文紀實節目主持人獎。另外「台語有影」的「啥人顧性命」演員楊小黎入圍迷你劇集最佳女主角，「藍色假期」演員邱姿雅也有入圍迷你劇集最佳新人。
節目類評審委員會主任委員 劉嵩：「規个金鐘評審的傳統，就是阮無啥會用投票的方式來決定，阮猶是透過無時間限制，充份討論和交換（意見）。其實這个時間佮精神，某種程度就是無希望有遺憾。」
根據文化部的統計，第60屆金鐘獎，戲劇類攏總1103件參賽、節目類也有889件作品，毋但數量創新懸，嘛反映出臺灣影視和聲音內容產業的多元和競爭力。今年頒獎典禮拍算10月17、18佇臺北流行音樂中心舉辦。
記者 呂尚儒 莊浚佑 臺北報導