「大師兄」林智勝佇昨昏摃出生涯第305支全壘打，替22年生涯留落來完美的紀錄。捌和林智勝做伙佇澳洲職棒拍拚的前日本火腿隊球星杉谷拳士，嘛佇社群祝福，而且閣貼心用台文字來發文，予網友留話，看著台文祝福實在足貼心。（新聞標題、導言及內文皆為台語文）
「大師兄」林智勝佇昨昏摃出伊個人第305支全壘打，替22年的棒球人生做完美的收尾。捌和林智勝做伙佇澳洲職棒拍拚的前日本火腿隊球星杉谷拳士，嘛佇社群祝福，閣共日語翻譯做台語貼佇下跤，網友攏講，看著台文祝福實在足用心。
味全龍內野手 林智勝：「對9歲拍棒球，拍到今43歲，34年，我無毋甘。」
味全龍球星林智勝，佇職涯頂上尾一場引退賽，伊感謝棒球帶予伊幸福的生活，那講那目屎流。
味全龍內野手 林智勝：「我真感謝棒球予我所有的物件，予我的家庭、予我的家族，真好真好的回報。」
禮拜日引退系列賽最後一場，林智勝也佇第六局下半場，摃出一支Home Run，這是伊棒球生涯第305支全壘打，伊已經是中華職棒的全壘打王，引退這場比賽，閣追加一支，摃出上有代表性的全壘打收尾。
聲音來源 球賽主播：「這球出手來看一下，林智勝，倒爿外野方向的飛球，距離敢有夠遠咧？這球全壘打。」
除了藝人、迷眾共伊祝福，林智勝較早做伙佇澳洲拍棒球的隊友，前日本球星杉谷拳士，也佇社群發文祝福，先用日語祝福、閣佇下面翻譯做台文字。頂面寫著「因為有閣見著你，我的人生就改變矣。會當閣做伙出賽，我感覺真光榮。對你的記持，我一世人攏袂放袂記」貼文一下貼起去，隨引起濟濟網友留話，看著台語祝福真感動，真用心也真貼心。
記者 鄭亞宣 謝季潾臺北報導