氣象署今仔日 (8/29) 舉行「秋季展望」的記者會，講著頂個 (7) 月攏總有7个風颱結成，臺灣也出現74年來，雨水量上濟的紀錄。另外，氣象署嘛提醒，紲落來9月進入秋季，可能閣有1、2个風颱會影響臺灣。（新聞標題、導言及內文皆為台語文）
日頭赤焱焱、民眾熱甲擋袂牢，根據氣象署的資料，新北市對8月22到今，已經連續7工出現局部38度以上高溫，其中上高溫出現佇三峽、有39度7，未來兩工各地溫度普遍攏佇32度-35度，甚至有的所在猶是有機會出現38度高溫。
氣象署科長 劉宇其：「溫度較懸的所在，就是佇新北市的五股，可能會來到38度的懸溫；阮嘛無排除佇臺北市的局部地區，嘛會有37、38度的懸溫出現；當然包括中南部內陸溫度嘛是較懸的。」
紲落來9月份就欲進入秋天，氣象署也整理今年熱天的天氣狀況，今年7月份陸續有7个風颱形成，累積的雨量，也創下74年以來的新懸。
氣象署氣象預報中心副主任 黃椿喜：「（夏季）雨量偏濟、日頭偏少，尤其7月拍破1951年以來的紀錄，氣溫的部份是小可仔偏低；風颱是集中佇7月形成，有7个。」
氣象署也預測未來秋季的天氣，預估今年秋天的溫度正常偏懸，雨水量也是正常偏濟，加上反聖嬰現象，秋天可能也會有1-2个風颱影響臺灣。
氣象署氣象預報中心副主任 黃椿喜：「秋季平均會受著1个到2个風颱影響；另外就是秋天風颱容易受著東北季風共伴的影響，佇北部佮東半部，通常是影響較明顯的。」
氣象署也提醒10月了後，中南部進入焦水期，提醒民眾到時愛注意用水狀況。
記者 鄭亞宣 謝季潾 臺北報導