高雄左營發生銃案 51歲通緝犯予人開5銃彈死

對畫面正爿雄雄狂狂走過來的人影，是拄開銃彈死人的兇手，穿黑衫的嫌犯8/22早起六點外埋伏佇死者厝附近，等到51歲姓羅的查埔人一出現，都隨giâ銃出來一路對死者開銃，攏總開16銃，死者身軀包括頭殼、頷頸、腹肚攏有空喙，確定死者倒落了後，嫌犯一路駛車來到橋仔頭附近放火燒車，疑似想欲消滅證據，阻擋警方的追查。警方表示初步研判，雙方是為著債務糾紛，因為死者是詐欺佮竊盜的通緝犯，是毋是閣有其他的原因，攏需要等待釐清。

高市左營分局長 謝承甫:「死者一寡仔手機仔的部份，目前是有看著一寡仔相關的證據，阮研判是有財務上的糾紛，抑若其他媒體所推論的部份，是毋是有(牽涉著)毒品的部份，目前阮會針對手機的部份，閣做一个鑑定」

因為死者佇家己的厝門口去予銃殺，也予民眾議論紛紛。有民眾講，死者搬來遮差不多年外的時間，出入定定駛無仝款車，予伊感覺誠奇怪，毋過馬有住戶對死者的印象真好，講伊那拄著人攏會相借問。

附近居民:「我看著的就是伊佮伊的某囝，in兜嘛毋捌看啥人來，就足單純 就是看著伊，in就是𤆬狗仔佇散步，閣有佇外口鑢塗跤按呢，伊若搪著人攏誠和氣，伊看著啥人攏會相借問」

附近居民:「，定定看伊駛無仝的車，親像有BMW 、Toyota的，閣有越野車、賓士，橫直(攏是)無仝的車種，我毋知影伊是佇咧做啥工課的」

因為命案現場是住宅區，民眾講警察局都佇附近，光頭白日發生銃擊案實在真恐怖。警方強調，初步認定嫌犯只有一人，目前已經鎖定嫌犯的身分，全力追查當中。

（新聞標題、導言為台語文）