五日節毋干焦扒龍船、食肉粽，古早人嘛號做「五毒日」，才會有掛艾草來辟邪等風俗。毋過佇臺南灣裡地區，猶有一項傳承超過一甲子的傳統—青草祭。當地南岩超峯寺透早就開始燃青草仔茶，怹總共用13種藥草，照佛祖媽的指示落去調配，欲連紲一禮拜免費分予鄉親啉平安兼退涼。（新聞標題、導言及內文皆為台語文）
十幾項藥草閣有烏糖，用大火落去燃，廟方工作人員透早五點就開始無閒tshih-tshih，主要就是咧顧這五鼎青草仔茶。過程中嘛閣愛人工落去抐，講按呢草仔氣才會出來。等兩點鐘，青草仔茶總算燃好勢，一工分五梯次，有濟濟民眾佇廟埕等欲包轉去啉，這是臺南灣裡南岩超峯寺超過一甲子的青草祭，5/29正式起鼓。
民眾：「我就放假出來提，順紲食一个平安按呢。」
民眾：「逐冬就是攏會燃，予逐家食予身體健康。（最近病毒嚴重特別來？）著啊！」
寺廟工作人員 謝來發：「藥頭燃一點鐘、藥劑燃一點鐘，攏總一番就是兩點鐘。（為啥物愛遮久啊？）按呢咧炕，青草仔味才會出來，精華嘛較會出來。」
根據了解，遮的青草攏是怹專工去臺東、花蓮取的，嘛是照佛祖媽指示來落去敆，攏總採兩噸外轉來，先經過日頭曝才過煮。會有這个傳統，主要因為早期醫藥費貴，真濟信徒無法度負擔，落尾才轉變做廟方燃青草仔結緣分予逐家啉，久來形成地方文化。
灣裡南岩超峯寺主委 林玉崑：「較早較濟工，較早有到十外工，這馬取較少，就變八、九工。阮一向攏佇五日節進前，因為熱佮冷的天氣（交接），因為五日節嘛是除百毒的節日。」
煮青草仔是灣裡限定的風俗，灣裡這个庄頭內，就有三間廟宇有這个例。這青草仔芳傳千里，嘛代表一份代代相傳的好心意，攏是志工佮在地徛家的無私奉獻。若超峯寺會連紲一禮拜免費提供予逐家啉。
記者 李晨宇 臺南報導