新竹縣頂個（4）月連紲幾若工接著通報，講有16隻柴犬夆放捒。警方追蹤車牌揣著狗仔的主人，除了共伊罰41萬5千箍，也將伊列入去禁止飼動物伴的烏名單。另外，動保所也揣大學寵物系的學生，來共狗仔洗身軀兼美容，等日後的裁決若確定，這寡柴犬就會開放予民眾認養。（新聞標題、導言及內文皆為台語文）
大大蕊的目睭看起來實在有夠古錐，看著有人倚近連鞭親切拍招呼，遮的柴犬頂個月佇新竹縣予人惡意放捒，經過動保所斟酌照顧、閣揣學生來替狗仔美容，每一隻狗仔的健康狀況攏誠好，抑若警方嘛揣著放捒狗仔的民眾，依法重罰41萬5千箍。
新竹動保所所長 彭正宇：「提著路口監視器，然後就掌握著（放捒狗仔）車主佮車輛行蹤。惡意放捒狗仔16隻，裁罰15萬；無替寵物絕育，裁罰25萬；無辦理寵物登記，罰萬5。合併裁罰41萬5千箍，而且共車主列入養飼烏名單。」
新竹縣流浪動物珍愛協會總幹事 湯宏正：「這是目前全臺灣真罕得看，猶毋過誠有指標性的重罰案例。阮會堅持依法開罰，目的毋是欲討罰金，是欲透過按呢的行動，來傳達明確的訊息，動物袂當隨意棄養，每一位飼主攏愛為家己的行為負責。」
動保團體指出，真歡喜看著惡意棄養的民眾受著重罰，毋過猶是呼籲政府應該修法，惡意棄養寵物行為愛負擔刑事責任，才會當有效預防這款代誌閣再發生。
新竹縣流浪動物珍愛協會總幹事 湯宏正：「呼籲立法院會當趕緊推動動保法修法的工課，共惡意棄養（動物）列入刑事責任，毋是干焦行政裁罰。阮相信罰則本身是必要的，毋過閣較重要的是，建立一套預防教育，或者是追蹤的機制。」
遮的狗仔除了健康無問題，嘛漸漸恢復對人的信任感佮安全感，紲落來會開放予民眾認養，予遮的命運坎坷的柴犬，揣著主人。
記者 張君豪 新竹報導