黑熊學院辦民防演練 模擬大量傷患救助流程

發現跤腿斷去的傷者，趕緊提出止血帶，縛咧大腿，捘予絚。四界攏是著傷的人，模擬大量傷患情境的時，愛按怎應對，這是黑熊學院辦第五屆的「藍鵲行動」演練，予學員實際應用民防課程學著的技術。

學員：「因為咱臺灣是地動帶嘛，其實原本防災訓練本成就應該做，民防的風潮起來，我想講本來該做的代誌，就順紲做，不管有戰爭無，本成就應該做。」
學員：「阮是文山區的民防自訓團體，阮平常就有咧做基本的急救訓練、野外求生，阮平常訓練人數較少，無法度遮爾完整，細節也無法度顧慮著遐完全，黑熊學院的藍鵲行動，是共規个災難救助的細節、急救的細節，做到較幼路化一寡。」

黑熊學院表示，這擺有120个學員參與演練，是五屆以來規模上大的，𪜶希望透過課程佮演練，增加民防的能量，若未來拄著災害的時，就有自救、而且幫助別人的能力。

黑熊學院執行長朱福銘：「這款複合性的災難，毋但有戰爭，其實佇地動、風颱，以臺灣這款高風險的國家，這寡訓練攏是咧平常時，有備無患，希望會當去使用的。」

為著提升民防的能量，內政部這陣也咧擴大「防災士」的訓練，希望佇今年達成10萬个防災士的目標。黑熊學院建議，政府通參考日本來修法，親像規定一定規模以上的企業，愛有一定比例的人受訓練、成做防災士，幫助達成10萬人的目標。