目前郵局寄包裹，郵差攏是用訊息或者是敲電話通知民眾，毋過真濟民眾驚這是詐騙電話，所以郵差定定揣無人。這陣，郵局拍算用App直接通知，閣較利便，嘛免驚夆騙去。（新聞標題、導言及內文皆為台語文）
郵局的郵務車入站，共一袋一袋的批閣有規籠的包裹落落來，準備分送。普通時仔民眾佇收包裹進前攏會接著郵差的電話，毋過定定人無佇厝，愛另外佮郵差約時間、或者是麻煩別人收。
民眾：「伊就會講，你敢有方便收包裹；我就會講，我無方便我就麻煩啥人，你幫我送去佗位按呢。」
民眾：「會，通常會閣另外約時間，家己佇的時陣才收件。」
毋過郵局也發現因為這馬詐騙訊息、詐騙電話愈來愈濟，民眾看著生份電話攏無欲接，郵差的通知就落勾去，所以中華郵政宣佈佇今年年底進前優化目前的郵局App，到時陣民眾也會當透過App收著收包裹、收掛號的通知。
中華郵政公司郵務處長 柯清長：「會透過這馬的行動郵局App提醒寄件佮收件的服務，避免民眾收著不明電話、訊息，造成民眾驚惶。」
民眾表示，若是未來有App提醒，會真方便，無有當時會袂記得。
民眾：「按呢也較確定。因為有當時包裹若濟，有時仔也會袂記得。」
中華郵政也表示，寄收批信的量對早期30億件到舊年大約賰17億件，未來會提升服務品質、優化App就是其中一步。抑若目前干焦是特約客戶才會使專工請郵差到厝共包裹提去寄，預估佇三月底會擴大予一般民眾也通申請，而且袂加收錢。
記者 張佳倪 謝季潾 臺北報導