二二八事件78週年，嘉義市二二八紀念文教基金會，今年活動是以紀念碑做主題，紹介全臺灣28座二二八紀念碑的建造過程閣有設計理念。希望予人來了解78年前，臺灣各地的二二八事件。（新聞標題、導言及內文皆為臺語文）
二十八座二二八紀念碑的資料，頂面毋但記錄過去捌發生過的悲劇，閣寫著按怎去到彼个所在。嘉義市二二八紀念文教基金會，舉辦二二八紀念碑的展覽，希望透過這个方式，予民眾知影二二八事件當中，各鄉鎮縣市的故事。
嘉義市二二八紀念文教基金會董事長 江榮森：「予咱全國的人民來了解著講，這个二二八這段歷史，各地所發生的二二八事件的代誌，予百姓來知影。」
嘉義市政府佮嘉義市二二八紀念文教基金會，逐冬攏會到二二八紀念公園，舉辦追思的活動。公園內底就有全臺灣第一座二二八的紀念碑，彼當陣捌是嘉義市長的總統府資政張博雅就講，這座紀念碑毋但是紀念，嘛希望是一種提醒。
總統府資政 張博雅：「彼當陣政府猶未開放，二二八事件記念彼个時陣咱就做矣。咱設這个紀念碑是因為，咱嘉義為著二二八事件，有真濟人犧牲，所以咱才感覺講，無設這个紀念的物件袂使。」
嘉義市長 黃敏惠：「逐家追求的公平正義、和平，咱的希望、逐家的向望，這个未來是咱逐家所期待的。臺灣嘛因為濟濟這个事件，咱會當記取教訓，然後閣徛起來。」
嘉義市二二八紀念文教基金會董事長江榮森指出，二二八事件到今已經78年，針對加害者歷史定位佮追究責任，這方面的的工課猶是無夠完整，呼籲新政府趕緊來完成，早一日還予受難者家屬一个交待。
記者 林緯廷 嘉義報導