高雄市對今仔日（21）暗時11點開始，欲停水55點鐘。經過市政府和水公司協調，目前有150搭臨時捾水站佮5搭自來水分所，予民眾捾水。佇鳳山嘛有里長佮廟宇，欲開放地下水予民眾使用，其中一个就是誠出名的龍目井。（新聞標題、導言及內文皆為臺語文）
用水拹仔拹水，遮爾傳統的取水方式，到今猶保留佇鳳山文山里的龍目井遮，這口井已經有兩百外年的歷史矣，因為21暗時11點開始，包括鳳山在內，高雄有幾若區攏停水55點鐘，若是水無夠用欲按怎咧，文山里這馬是開放民眾來龍目井，24點鐘攏有水通捾。
高市文山里鄰長 林金源：「所有遮的民眾，毋是干焦阮這个里會使，其他別个里別个所在，攏會使來遮提水。若有欠水的人需要，欲沖水啦、欲煮啦，這个煮嘛會當，愛煮才會當。所以就是講遮，24點鐘攏會當予人使用水。」
取水民眾：「看水偌清就好矣。」
用水khat仔共水倒入去桶仔底，遮是過埤仔福德宮，廟裏有一口五十年歷史的山泉水井，平常時都有濟濟信眾來捾水食平安，這擺拄著高雄大停水，這幾工就有外地人特別來遮捾水，廟方也講，有欠水的人，攏會當來遮捾。
高市過埤福德宮主委 簡仁爘：「較早都攏蓋濟人來佇入矣，入這kang水矣。啊較早的時陣，遮水蓋好嘛，有時陣排隊排蓋長。頭拄仔嘛是蓋濟人來入矣，市內凹仔底的有來入矣，伊拄仔載走爾。」
民眾：「差不多五跤（桶仔），大細跤差不多五跤咧啦。水塔，猶會使啦，按呢應該度會過啦，度會過啦。（會煩惱無啊？）正常是應該略仔會擔心啦。」
這擺因為竹寮站頭前欲換管線，高雄停水影響著15區四十八萬戶的用水，雖罔水公司攏總有設150搭加水站，毋過停水時間傷長，毋管是店頭猶是倚家，攏想辦法加儉寡水，度過這擺停水的無方便。
記者 許嘉茹 邱紹揚 高雄報導