屏東市殯葬所最近因為年節仔歇睏，閣搪著季節交替，過往的人變較濟，毋但禮儀廳無夠用，愛臨時搭布棚來應急，連欲用火葬場，嘛愛等到後個（3）月。（新聞標題、導言及內文皆為臺語文）
對這爿看過去，所有的靈堂攏是滿的，另外一爿，仝款嘛是滇的。屏東市殯葬所的火葬場，自過年開工以後就出現窒車的狀況，這馬排隊等欲火化的往生者已經排到3月初，附近四个私人殯葬業者閣加上公家的，總共有111个靈堂，因為實在是無夠用矣，現在連臨時靈堂攏有人注文。
殯葬業者館長 小鳳：「這馬目前靈堂的狀況，是有無夠的狀況按呢。攏是可能就是，拄好告別式出了的時，後壁就有人直接補入去；抑是講暗時來，伊欲囥結果無靈堂，伊攏愛等到告別式出了的時陣，伊才會當囥入去。」
禮儀公司業者：「好日子當然逐家攏欲用，毋好的日子當然一定也會有火化，只是看敢欲用。」
有業者表示，可能因為過年歇睏，閣加上天氣變化，雄雄往生的比例變懸。殯葬所是表示，以往過年前後火化的數量攏會增加，今年佮往年比起來，確實加差不多10趴，毋過燒的爐仔干焦五口，有需要時一工上濟火化24具大體，尤其愛考慮爐仔是毋是會堪得，親像這馬就有一口歹去。
屏東市殯葬所長 黃昱明：「因為我愛顧機械，所以增加，我會增加一件兩件，若超過我驚機械會故障。人員，我攏是要求人員加班按呢。因應，正經無法度加的時陣，兩種辦法：一種就是請家屬另外看時看日；一種就是講，啊無，對南猶是對北的，遐的火化場落去安排看覓。」
殯葬所表示，屏東市有六成的往生者會送來遮，四成佇厝辦，種種因素集集做伙，才會有窒車排隊的現象，目前已經沓沓仔消敨矣，三月應該就會恢復正常。
記者 許嘉茹 邱紹揚 屏東報導