新竹燈會主燈無成蛇 裝置藝術像杜蚓仔惹議

這幾隻搖來搖去的物件，予人批評看袂出來到底是蛇抑是杜蚓仔。新竹市今年的元宵燈會，佇市區內的東門城附近打造六个無仝主題的裝置藝術，有民眾講看甲霧嗄嗄。

民眾講：「是真有創意，毋過若像甲(蛇)主題有一點仔無仝，看起來有一點仔像杜蚓仔。」、「正面看起來面像雞仔囝，我感覺對邊仔看就像一个彩虹糖。」

針對主燈的造型，逐家有無仝款的意見。也有議員針對今年燈會的預算提出質疑。

民眾講：「主燈看起來就無像蛇，感覺無認真做。」

新竹市議員楊玲宜講：「開870萬，毋但予民眾嫌，而且是有夠䆀，規个展區規模範圍嘛變細，主燈予人看起來感覺真無聊閣無好看。」

新竹市城市行銷處副處長謝濬鴻講：「市府辦理過好年的活動已經連紲真濟年，自舊年開始，就共燈會活動佮元宵暗會結合辦理，今年的預算規模，參往年整體預算金額差無外濟。」

市府強調燈會870萬的費用，毋但用佇製作燈具，閣有包括元宵暗會活動，以及免費發予民眾的環保鼓仔燈，金額開銷佮過去差不多，只是媠䆀在人佮意，這改的裝置藝術，也意外引起外界討論。