今仔下晡閣有一波大陸冷氣團落南，氣象署嘛針對苗栗以北、金門地區發布低溫燈號。氣象署提醒，拜四天光是這波冷氣團上寒的時陣，苗栗以北佮金門，溫度可能無到10度，天氣會真寒。氣象署也提醒，拜六閣有另外一波冷氣團落南，會一直寒到後禮拜二。（此則新聞標題、導言、內文皆為臺語文。）
聖誕節欲到矣，民眾戴聖誕帽仔佮朋友翕相，逐家規身軀包牢牢，真有寒天的氣氛，因為拜三下晡閣有一波大陸冷氣團落南，全台大降溫。氣象署針對苗栗以北地區佮金門地區，發佈柑仔色、黃色的低溫燈號，氣象署預估拜四天光，一寡所在溫度可能無到10度。
氣象署預報員 林定宜：「苗栗以北的地區、金門地區，出現10度以下的機率是上懸的。」
這波冷氣團會維持到拜四，氣象署預估愛到拜五，大陸冷氣團減弱，溫度才會慢慢的回升。毋過，真緊拜六就隨閣有一波大陸冷氣團落南，一直影響到後禮拜二。氣象署預估愛到25聖誕節彼工天氣才會回溫。
氣象署預報員 林定宜：「未來一禮拜溫度的變化，是分做兩波的冷氣團。第一波就是對今仔日（拜三）開始，一直到拜五的透早為止；到拜六的時陣，有另外一波的大陸冷氣團落南。」
抑若落雨的部份，氣象署表示，拜三、拜四這兩工，北部、東半部會有短時間的陣雨。若是水氣有夠、加上溫度有夠低，中部3000公尺，佮北部、東半部2000公尺以上的懸山攏有機會落雪，提醒鄉親這幾日仔，愛穿予燒，避免感著。
記者 鄭亞宣 許猛捷 臺北報導