創廟到今，已經有355冬歷史的國定古蹟「臺灣府城隍廟」，今年辦花燈活動。廟方頭擺以城隍爺算人善惡的工具「算盤」，設計一座算盤花燈，唌民眾認捌城隍爺的文化。(這則新聞標題、前言、內文為臺語文。)
一粒粒紅色的花燈無止仔媠閣大範，廟埕規大片的燈海唌人注目。詳細看花燈的頂懸有勸人做善事的話語，這是有355冬久的臺灣府城廟辦的燈會活動，廟方發揮創意，提廟內鎮殿之寶大算盤的造型來設計花燈。廟方指出，大算盤是城隍爺咧算人善惡的工具，𪜶用輕鬆的方式，欲通予人來認捌城隍爺的文化。
台南市大員文化觀光協會理事長張明山表示：「就是講勸人向善一生盡量做善事，若講做歹事當然逃袂過城隍爺的算盤，伊一算加加減減大概善惡功過就出來矣。」
民眾郭先生認為：「這對咱臺灣文化的發揚真正有足大的幫助，希望講會當閣擴大、會當閣繼續。」
看燈閣無夠氣，特別的是廟方共平常時收藏佇文物館、有300偌公斤大算盤展予逐家看，兼開放予人摸求平安。另外，金龍年新正年頭，廟方嘛做一面雙龍神龕，閣攢金色的麟片貼紙，予民眾寫名貼起去祈福。廟方講，貼龍麟、得龍銀，有祈求四季順序、趁大錢的意涵。
民眾林先生認為：「有貼這金色金幣的物件，就是來圓一个夢。」
臺灣府城隍廟主委郭榮哲表示：「廟內底有兩隻古文物的龍，咱共畫落來佇現場，開放予民眾貼伊的麟片，龍頭閣共做予浮起來，象徵龍出頭啦。」
府城隍廟的花燈展期到三月初十，廟方頭一擺用上百粒算盤的珠燈來點化人心，𪜶主要是欲傳達知善、惜福的理念，這嘛呈現無仝文化傳承的方式。