欲倚年囉，逐个人兜攏開始準備大摒掃，袂少人會用雞毛筅筅黗，彰化埔鹽就有一个縛雞毛筅老師傅陳忠露，已經70捅歲，做雞毛筅一甲子，攏總手工，每一步攏無凊彩，這幾冬也開發新造型的雞毛筅，佇傳統手路求變化。
倒手捏棉仔線，正手黏雞毛，老師傅陳忠露當咧做雞毛筅。伊講早前年仔節仔，才有咧刣雞，雞毛大部分攏㧒擲捒，當時日子歹過，所以伊的老爸就去抾雞毛轉來做雞毛筅賣錢，伊16歲開始綴咧學手藝，一做就是一甲子的時間。陳忠露做的雞毛筅，閣會依照雞毛分類，長短毛色水攏真講究
雞毛筅師傅陳忠露表示：「尾溜的毛尻脊骿毛，閣再來就是頷仔頸毛，閣再來腹肚的毛，這雞公四部份，但是分開較好看，一般咱咧做分開做雞毛筅才會媠。」
過去因為鹿港木雕、佛仔店的出現，帶動彰化雞毛筅的需求，加上雞毛筅有起家的意思，所以入厝、嫁娶嘛攏會買，所致當時陳忠露的雞毛筅佇地方通人知，雖罔這陣手工雞毛筅稀微，但是做六十冬的感情嘛予陳忠露毋甘放
雞毛筅師傅陳忠露表示：「這恩情真大，咱彼陣無地趁，這予咱起家起來，感情啦 一種意義啦，你講無做感覺真怪啦。」
陳忠露家後許金英表示：「利純無好啦，無好就罔檢，有通做就好，做慣勢 逐家攏 較媠的雞毛，抾來賣阮啦。」
陳忠露表示，做雞毛筅已經一世人囉，講無愛做感覺真拍損。這幾冬伊也有開課教人縛雞毛筅，以及開發無仝造型的雞毛筅，佇傳統手路當中求變化，陳忠露用伊的手藝，予雞毛筅毋但是摒掃的工具，嘛成做生活中的藝術品。