為著欲推廣在地文化佮母語教育，新竹市佮教育文化業者合作，出版《城隍祭的秘密任務》台語有聲繪本，活潑趣味的圖加上臺語、華語兩種版本，來講新竹市城隍祭的踅境儀式，希望提升逐家對本土語言佮文化的認同。（此則新聞標題、導言、內文皆為臺語文。）
鬧熱滾滾的陣頭表演，這是逐年舊曆七月半、新竹城隍爺踅境活動，為著予閣較濟人來認捌在地廟會文化，新竹市特別邀請教育文化業者，設計台語佮華語的《城隍祭的秘密任務》繪本。
臺灣吧執行長蕭宇辰說明，「新竹都城隍廟有誠豐富的智識面向，阮選擇用習俗文化領域，內面的竹塹中元城隍祭做故事主題，參新竹都城隍廟的其他智識比並，踅境活動對囡仔來講是比較熟似的，對蹛踮城隍廟附近的學生來講，鬧熱的踅境活動更加是生活記憶的一部分，民眾只要利用手機仔掃繪本頂面的qr code，就會當著台語發音的紹介。」
「逐冬的迎城隍攏是農曆七月辦的，像咱咧歇熱按呢，農曆七月陰間的好兄弟，嘛會來人間放假。」
有聲繪本的內容主要是咧講中元城隍祭的故事，會當學台語嘛會當認捌民俗文化的歷史意義。
臺灣吧執行長蕭宇辰表示，「阮共智識內容包裝做故事劇情，予囡仔閣較好了解地理資訊，故事中的角色表現、情感轉變，以及克服困難的過程，會當引起囡仔的興趣佮共鳴。」
新竹市文化局秘書邱淑芳強調，「希望透過簡單的圖文故事，予咱的囡仔會使熟似，竹塹中元城隍祭的在地文化，嘛提升囡仔對本土語言，以及文化的認同感。」
新竹市文化局指出《城隍祭的秘密任務》繪本，目前除了佇新竹市的圖書館看會著，嘛已經送去國小，當做推廣台語的教材。