彰化縣、南北管音樂戲曲館、舉辦臺語文化體驗日，邀請今年傳藝金曲獎、評審團獎著獎團體、光興閣掌中劇團，搬趣味的布袋戲齣；演出內容加入臺語的俗諺、笑詼，予民眾看布袋戲，也學著臺語的智慧。(這則新聞標題、前言、內文為臺語文。)
表演者盤喙錦：「猴跋落去樹跤去挵著狗，猴嘛走、狗嘛走，毋知猴驚狗，抑是狗驚猴。」
用盤喙錦來表現臺語的聲調變化，這是佇今年傳藝金曲獎提著評審獎的光興閣掌中劇團，帶來的台文趣味布袋戲演出，唌袂少家長𤆬囡仔來看戲
民眾講：「這馬布袋戲較少看，拄好有這个機會，囡仔來遮看覓按呢，接觸傳統的表演按呢。」
另外也有其他民眾分享：「有臺語的課，所以就𤆬𪜶來參觀看覓，看對臺語，會加一寡仔興趣按呢。」
彰化縣南北管音樂戲曲館，舉辦臺語文化體驗日活動，邀請光興閣掌中劇團演出，用臺灣金光布袋戲落改編，加入臺語教學的內容，希望予囡仔人理解日常當中的臺語用法。
光興閣掌中劇團團長林宏憲講：「阮攏希望講用阮的戲，予咱的觀眾朋友，佇日常當中用會著的臺語提來用，所以阮這改的戲內底，大部份用的攏是咱日常生活。譬如講十二月屎桶－－盡摒矣；一兼二顧－－摸蜊仔兼洗褲，這種臺語文。」
林宏憲團長表示，布袋戲演出有真濟孽譎仔話、臆謎猜，希望民眾透過趣味的演出，佇娛樂當中來學習，認捌臺語的智慧佮奧妙。